Hüquqi yardım

Peşəkar vəkil

Peşəkar vəkilə məxsus xüsusiyyətlər. Vəkil axtaranda nəyə diqqət yetirilməlidir?

Cəmiyyətdə tutduğu mövqeyindən, vəzifəsindən və digər kriteriyalardan asılı olmayaraq hər kəs müasir dövrdə üzləşdiyi müxtəlif problemlərdən dolayı peşəkar hüquqi yardıma ehtiyac duyur. Məhz, bu problemləri həll etmək üçün insanların müraciət etdiyi şəxslər hüquqşünaslar, əksər hallarda vəkillər olur. 

Bəzi hallarda, hüquq müdafiəçisi icraatında olan onlarla (bəzən daha çox) işləri həll etmək üçün nəinki bir gününü, heç bir neçə saatını belə ayıra bilmir (və ya ehtiyac duymur). Bu vəziyyətdən əziyyət çəkən əlbəttə ki, yenə də vətəndaş olur. Öz həyati əhəmiyyətli hüquqi problemini həll etmək üçün vəkil dəstəyinə ehtiyac duyan vətəndaş bu durumda “ağı qaradan” necə seçməlidir?! 

Vətəndaş – vəkil münasibətində sağlam zəminin formalaşması üçün peşəkar vəkil imicinin formalaşması mütləqdir.

Peşəkar vəkil qarşılaşdığı problemlərin öhdəsindən gəlmək üçün analitik düşüncəyə malik olmaqla, problemi və onun qaynaqlandığı mənbəni təyin etdikdən sonra həll yollarını müəyyənləşdirməli və buna adekvat tədbirlər görməlidir.

Vəkillik böyük səbr, əzm və inandırma tələb edir. Pəşəkar vəkilin ona hüquqi yardım almaq üçün müraciət etmiş şəxslərlə qarşılıqlı münasibətləri vəkilin dürüst və ədalətli olmasına dəlalət edən etimad üzərində qurulmalıdır. Ona müraciət edən şəxsə “narahat olmayın, bu işi 100% sizin xeyrinizə həll edəcəyik” kimi vədlər vermək əvəzinə, peşəkar vəkil gördüyü iş etibarilə həmin məsələnin həlli üçün kifayət qədər araşdırma aparmalı və yüksək peşəkarlıqla şəxsi müdafiə etdiyinə onu inandırmağı bacarmalıdır. Peşəkar vəkil imicinin formalaşması insanları inandırmaq bacarığı ilə vəhdət təşkil edir.

Həqiqət odur ki, peşəkar vəkil ünsiyyətin dinamik, çoxistiqamətli məlumat və ideyalar axını olduğunu anlamalıdır. Peşəkar hüquq müdafiəçisi öz probleminin həlli üçün ona müraciət edən şəxslərin dedikləri ilə maraqlandığını nümayiş etdirməli və onların məqsədlərini dərk etməlidir.

Peşəkar vəkil imicinin formalaşmasında, vəkillərin nüfuzunun artırılması və ona olan etimadın yüksəldilməsində “Vəkillərin davranış qaydaları haqqında Əsasnamə”nin müstəsna rolu vardır. Vəkillərin müstəqilliyinin təminatı qismində çıxış edən bu davranış kodeksi peşəkar vəkilin öz peşə fəaliyyətində rəhbər tutmalı olduğu əsas qaydaları müəyyən etməklə vəkilin öz davranışı və peşəkar fəaliyyəti ilə cəmiyyətin vəkilliyə olan inamını artırma kimi ali məqsədi ifadə etmişdir.

Vəkil öz peşə fəaliyyətini həyata keçirən zaman maraqların toqquşmasına yol verməməli, ona müraciət edən şəxslərə münasibətdə dürüstlük və ləyaqət nümayiş etdirməli, digər şəxslərin ağır maddi və sair vəziyyətindən yararlanmamalı, öz peşə və şəxsi məqsədlərinə çatmaq üçün digər qanunsuz vasitələrdən istifadə etməməlidir. Peşəkar vəkilin ən ümdə keyfiyyətlərindən biri də hüquqi yardımla bağlı ona müraciət edən şəxslərə dair məlumatların konfidensiallığını qorumaqdır. Həmçinin, vəkil digər şəxslərlə münasibətdə etik davranış qaydalarına əməl etməli, peşə fəaliyyətini həyata keçirərkən və peşə fəaliyyətindən kənar bütün şəxslərlə münasibətdə mədəni, nəzakətli, diqqətli və səbirli olmalıdır.

Peşəkar vəkil fəaliyyəti təkcə vəkilə hüquqi yardım üçün müraciət edən müştəri ilə deyil, həmçinin vəkilin öz həmkarlarına münasibətdə hörmətlə davranmağı, onların şərəf və ləyaqətini alçaldan hərəkətlərə və kobud rəftara yol verməməyi şərtləndirir.

Məşhur bir aforizmdə deyildi kimi “yaxşı vəkil hüququn, mükəmməl vəkil isə ədalətin carçısıdır”. Buna görə də hər bir şəxs öz hüquqlarının müdafiəsini peşəkar vəkilə həvalə etdiyi təqdirdə ədalətin bərqərar olmasına və uğurlu nəticəyə nail ola bilər.

#vəkil # vekil # vəkillər kollegiyası # huquqi yardim # vəkillər kollegiyası rəsmi saytı # vəkillərin siyahısı