Birgə nikah dövründə əldə edilmiş əmlakın bölünməsi qaydaları, hüquqi tənzimləmələr və proses haqqında ətraflı məlumat əldə edin.
Ər-arvad dedikdə, ailə qurmaq məqsədilə nikahları qeydiyyat şöbəsində (keçmiş ZAQS) qeydə alınan kişi ilə qadın başa düşülür.
Əgər ərlə arvad nikaha daxil olarkən və ya ondan sonra nikah müqaviləsi bağlamayıblarsa, onda nikahdan sonra onlar tərəfindən əldə edilən əmlak onların ümumi birgə mülkiyyəti sayılır.
Ər-arvadın ümumi gəlirləri hesabına əldə edilən əmlaklar ər-arvadın ümumi birgə mülkiyyəti sayılır.
Ər-arvadın ümumi əmlakı dedikdə, ailə birliyində əldə edilmiş və pulla qiymətləndirilə bilən bütün aktivlər və passivlər nəzərdə tutulur. Aktivlərə daşınar və ya daşınmaz əşyalar üzərindəki mülkiyyət və digər əşya hüquqları, müqavilədən və ya qanundan irəli gələn tələb hüquqları, hüquqi şəxslərdə (şirkətlərdə) payları, əqli mülkiyyət hüquqları (ixtira və s.), gəlirlər və s. predmetlər, passivlərə isə ümumi öhdəliklər aiddir (kreditlər və s.).
Misal: Ər nikah dövrü ərzində öz adına avtomobil almışdır. Bu halda avtomobilin texniki pasportunda (texpasport) yalnız ərin adı göstərilsə belə, avtomobil ümumi birgə mülkiyyət sayılır və ərlə bərabər eyni hüquqlar arvada da məxsusdur.
Qiymətli kağızlar: istiqrazlar, səhmlər və s.
Kredit idarələrinə və s. kommersiya təşkilatlarına qoyulmuş paylar, əmanətlər, kapitaldan olan paylar.
Evlilik dövrü ərzində alınan daş-qaş və digər zinət əşyaları (əgər onlar hədiyyə kimi verilməyibsə).
Ailə birliyi ümumi təsərrüfatı özündə ehtiva etdiyi üçün nikah müddətində əldə edilmiş əmlakın ər-arvadın ümumi vəsaiti hesabına qazanıldığı ehtimal olunur. Ailə Məcəllənin 32.3-cü maddəsində nəzərdə tutulmuşdur ki, nikah dövründə ev təsərrüfatı ilə, uşaqlara qulluq etməklə məşğul olduğundan və ya digər üzrlü səbəblərə görə müstəqil qazancı olmayan arvad (və ya ər) da ümumi əmlak üzərində hüquqa malikdir.
Ər-arvaddan birinin şəxsi əmlakı, yəni nikaha daxil olmazdan əvvəl artıq onlara məxsus olan əmlak da ümumi birgə mülkiyyət sayıla bilər. Bu o halda mümkündür ki, həmin əmlakın dəyəri ərlə arvadın ümumi əmlakı və ya digər tərəfin əmlakı və ya vəsaiti hesabına əhəmiyyətli dərəcədə artsın. Ərin - arvadın hər birinin əmlakına istənilən yaxşılaşdırma deyil, yalnız onun dəyərini xeyli (əhəmiyyətli dərəcədə) artıran yaxşılaşdırmanın edilməsi və bu yaxşılaşdırmanın məhz nikah dövründə onların ümumi əmlakı və ya digər tərəfin ayrıca əmlakı hesabına həyata keçirilməsi müəyyən edilərsə, bu maddənin tətbiqi mümkündür.
Misal: Nikaha daxil olmamışdan əvvəl ərin adına orta bazar dəyəri 50 000 manat olan mənzil vardır. Nikah dövrü ərzində həmin əmlak ər-arvadın birgə qazancı hesabına 25 000 manat dəyərində təmir edilmiş və təmirdən sonra əmlakın bazar dəyəri 70 000 manat olmuşdur. Bu halda həmin əmlak da ümumi birgə mülkiyyət sayıla bilər. Çünki əmlakın dəyəri onların birgə pulu hesabına əhəmiyyətli dərəcədə (50%) artmışdır.
Həmçinin birgə nikah dövrü ərzində ipotekaya alınmış əmlak da ər-arvadın ümumi əmlakını təşkil edir və onlar arasında bölünür.
Birgə nikah dövründə xidməti və sair fəaliyyətinə görə qulluq illəri və/və ya ailə üzvlərinin sayı nəzərə alınmaqla ər-arvada verilən əmlak da (məsələn, müəyyən müddət ərzində qüsursuz xidmətlərinə görə hərbçilərə dövlət tərəfindən verilən yaşayış sahələri) ümumi birgə mülkiyyət hesab edilə bilər.
Belə ki, həmin əmlak ərə (arvada) pul vəsaiti qarşılığında verilməsə də, birgə nikah dövründə onun çəkdiyi zəhmət, əmək və digər səylərin əvəzi kimi təqdim edilir. Odur ki, müəyyən nailiyyətlərinə, o cümlədən uzun illər qüsursuz fəaliyyətinə görə işçilərə (dövlət qulluqçularına, hərbi qulluqçulara və sair) verilən əmlak (əşya, hüquq, vəsait) bağışlama kimi qəbul oluna bilməz. Çünki Mülki Məcəllənin 666.1-ci maddəsinə əsasən hədiyyə verənin öz əmlakının bir hissəsini bağışlamaqla hədiyyə alanı zənginləşdirdiyi əqd hədiyyə alan tərəfindən heç bir cavab xidməti ilə şərtləndirilməməlidir. Lakin sözügedən halda əmlak ərə (arvada) əsasən onların uzun müddətli səmərəli xidməti qarşılığında verilir.
Başqa sözlə, bu vəziyyətdən söhbət bağışlamadan deyil, əmək (qulluq) fəaliyyəti qarşılığında verilən əmlakla bağlı olduğundan Ailə Məcəlləsinin 32-ci maddəsinin təsir dairəsinə düşür. Bununla yanaşı, hər bir işin hallarından, o cümlədən ərə (arvada) müvafiq güzəşti əldə etmək üçün tələb olunan dövrün hansı hissəsinin birgə nikaha düşdüyü, əmlakın verilməsinin məqsədləri və təyinatı, əmlak verilərkən ailə vəziyyətinin (ailə üzvlərinin sayının) nəzərə alınıb- alınmamasından asılı olaraq, belə əmlak ər-arvadın ümumi mülkiyyəti hesab edilsə də, tərəflərin həmin əmlak üzərində payları bərabər müəyyən olunmaya bilər.
Mülki Məcəllənin 180.2-ci maddəsinə müvafiq olaraq, özbaşına tikinti aparmış şəxs ona mülkiyyət hüququ əldə etmədiyi üçün həmin tikili müstəqil daşınmaz əşya kimi ər-arvad arasında bölgünün predmeti ola bilməz. Bununla yanaşı, ər-arvadın ümumi əmlakının bölünməsi barədə mübahisə həll edilənə qədər özbaşına tikinti sökülməyibsə, o, fiziki obyekt olaraq özündə ər-arvadın əməyinin və xərclərinin nəticəsini ifadə edən maddi dəyərdir.
Odur ki, mübahisə olduğu halda, məhkəmə obyektiv səbəblərdən özbaşına tikintinin faydalı xassələrindən istifadə etmək imkanlarından məhrum olan ərin (arvadın) iddiası əsasında onların ümumi əmlakı hesabına inşa edilməsinə və ya faktiki əldə olunmasına sərf olunmuş ümumi vəsaitin əmlakdakı payına mütənasib olan hissəsini arvaddan (ərdən) tutmaqda haqlıdır. Yəni ki, iddia edən tərəf boşanma zamanı sənədsiz evin bölünməsini tələb edə bilməsə də, həmin evin inşa edilməsinə xərclənmiş məbləğin 50% tələb edə bilər.
Mənzil Məcəlləsinin 112.1-ci maddəsinə əsasən, mənzil-tikinti kooperativinin üzvü pay haqqını tam ödədikdə, yaşayış sahəsinə mülkiyyət hüququ əldə etdiyi üçün həmin sahə də ər-arvad arasındakı bölgünün predmeti olur. Mülki Məcəllənin 178.8-ci maddəsinə uyğun olaraq podrat müqaviləsi üzrə inşa edilən çoxmənzilli yaşayış binalarının dövlət reyestrində ilkin qeydiyyata alınmamış müstəqil tərkib hissələri (mənzil və ya qeyri-yaşayış sahələri) üzərində mülkiyyət hüququ əmələ gəlmədiyi üçün ər-arvadın ümumi mülkiyyəti sayıla və bölünə bilməz.
Bununla yanaşı, birgə nikah dövründə ər-arvadın ümumi əmlakı hesabına çoxmənzilli yaşayış binalarında yerləşən, lakin dövlət reyestrində ilkin qeydiyyata alınmamış mənzil və qeyri-yaşayış sahələrinə dair bağlanmış müqavilələr həmin sahələrə dair belə müqavilələrdən irəli gələn, habelə gələcəkdə mülkiyyət hüququnun tanınması da daxil olmaqla bir sıra hüquqlar əmələ gətirir. Belə mənzil və qeyri-yaşayış sahələrinə hüquqlar da ər-arvadın ümumi əmlakına daxil olduğundan bu hüquqda tərəflərin payları müəyyən edilə bilər. Məsələn, ərin (arvadın) iddiası əsasında məhkəmə qət edə bilər ki, konkret tarixli və nömrəli müqavilədən əmələ gəlmiş hüquqda ər-arvadın hər birinin payı müəyyən edilsin. Bu hüquq gələcəkdə ər-arvaddan birinin adına daşınmaz əmlakın dövlət reyestrində qeydiyyata alınarsa, digər tərəfin də hüququ qətnamədə müəyyən edilmiş paya mütənasib olaraq tanınmalıdır.
Qanunvericiliyin tələbinə əsasən əksi sübuta yetirilənədək nikah müddətində ər və ya arvad tərəfindən əldə edilmiş əmlak ər-arvadın ümumi birgə mülkiyyəti sayılır
Ailə Məcəlləsinin 34-cü maddəsində əsasən, nikaha girənədək ər-arvaddan hər birinə məxsus olmuş əmlak, habelə onlardan birinin nikah dövründə hədiyyə kimi və ya vərəsəlik hüququ qaydasında aldığı əmlak və fərdi istifadədə olan əmlak (paltar, ayaqqabı, kitab) ümumi birgə mülkiyyət sayılmır. Bu onların hər birinin ayrıca (fərdi) mülkiyyətindədir.
Ailə Məcəlləsinin 32.2.2-ci maddəsinin mənası baxımından ərin və ya arvadın şəxsi vəsaiti hesabına əldə edilmiş əmlak ərin və ya arvadın ayrıca əmlakı hesab edilir.
Misal üçün ərin (arvadın) ayrıca əmlakı hesabına nikaha daxil olanadək dəyəri tam ödənilmiş yaşayış və ya qeyri-yaşayış sahəsi birgə nikah dövründə ərin (arvadın) adına daşınmaz əmlakın dövlət reyestrində qeydə alınsa da, ümumi əmlak hesab edilmir.
Əgər ər (və ya arvad) nikahdan əvvəl ona məxsus olan əmlakı satmış və həmin vəsaitə artıq nikah dövrü ərzində əmlak almışsa və bununu sübuta yetirə bilərsə onda birgə nikah dövründə alınmış mənzil ər-arvadın ümumi birgə mülkiyyəti sayılmaya bilər.
Əgər işin halları ilə ərə (arvada) ayrıca məxsus olan əmlakın əvəzli özgəninkiləşdirilməsi nəticəsində yeni əmlakın əldə edildiyi müəyyən edilərsə, məhkəmələr özgəninkiləşdirilən predmetlə əldə olunan əmlak arasında qiymət fərqini də nəzərə almalıdır. Belə ki, əgər özgəninkiləşdirilən əmlakın dəyəri əldə edilən əmlakın dəyərinə bərabər və ya ondan artıqdırsa, əldə olunan predmet ərin (arvadın) ayrıca əmlakı kimi qiymətləndirilə bilər. Lakin özgəninkiləşdirilən əmlakın dəyəri əldə edilən əmlakın dəyərindən azdırsa və məhkəmə onu ər-arvadın ümumi mülkiyyəti kimi qəbul edirsə, həmin əmlak üzərində tərəflərin payları əşyanın əldə olunduğu anda sərf olunmuş ayrıca vəsaitə və ər-arvadın ümumi vəsaitinə mütənasib olaraq müəyyən edilməlidir.
Misal üçün: ər evlilikdən əvvəl ona məxsus əmlakı 100 000 manata satıb birgə nikah dövrü ərzində 200 000 manata mənzil alırsa onda mənzil üzərində payıar 100 000 manatlıq hissəsi nəzərə alaraq bölünəcəq və ərə evin ¾ qaıdna isə ¼ hissəsi düşə bilər.
Nikaha daxil olanadək və nikah dövründə keçirilən mərasimlərdə (elçilik, nişan, toy və sair) tərəflərdən birinə hədiyyə verilən zinət əşyaları onların ayrıca əmlakı sayılır və Ailə Məcəlləsinin 34.2-ci maddəsində müəyyən edilmiş istisnanın təsir dairəsinə düşmür
Qanunvericilik həmçinin rəsmi nikahda olsalar da, onların birgə təsərrüfat aparmadığı dövrdə hər birinin qazandığı əmlakı ümumi əmlaka aid etmir. Belə ki, Ailə Məcəlləsinin 36.5-ci maddəsinə müvafiq olaraq, məhkəmə ər-arvadın ailə münasibətlərinə xitam verdiyi və ayrı yaşadığı dövrdə hər birinin qazandığı əmlakı onların hər birinin mülkiyyəti hesab edə bilər. Bu baxımdan birgə nikah dövründə əldə olunmuş əmlakın bölgüsü zamanı faktiki nikah münasibətlərinə xitam verildiyi və birgə təsərrüfatın başa çatdığı tarixin müəyyən olunması işin düzgün həlli baxımından mühüm əhəmiyyət kəsb edir.
Əgər öhdəliyin tərəfi yalnız ər-arvaddan biridirsə, ağlabatan mühakimə baxımından, yaranmış borc o zaman ümumi hesab olunur ki, öhdəliyin tərəfi olan ər (arvad) öhdəlik üzrə əldə edilənlərin ailənin ehtiyacları üçün sərf olunduğunu sübut etsin, yaxud bu fakt işin mübahisə olunmayan halı olsun. Həmçinin birgə nikah dövrü ərzində əldə edilən borc məsələsi ilə bağlı tərəflərin rəsmi nikah münasibətlərində olsalar da, ailə münasibətlərinə xitam verib-verməməsi, birgə təsərrüfat aparıb-aparmaması faktları da nəzərə alınmalıdır.
Misla üçün birgə nikah dövrü ərzində ər tərəfindən bankdan 10 000 manat dəyərindəkredit götürülür və həmin məbləğə tərəflərin yaşadığı mənzil təmir edilirsə onda boşanma zamanı həmin kredit birgə öhdəlik kimi nəzərə alınacaq və həmin 10 000 manatın və ya qalıq məbləğin yarısının ödənilməsi öhdəliyi arvada keçəcəkdir. Yox əgər ər tərəfindən Bankdan götürülən kredit pul məbləği onun şəxsi ehtiyacları üçün xərclənibsə (bahalı paltar, səyahətlər və s.) onda həmin kredit üzrə öhdəlik bölünmür və bütün borc borcu götürən şəxsin üzərində olduğu kimi saxlanılır.
Ərin (arvadın) öhdəlikləri üzrə tutma onun mülkiyyətində olan əmlaka, habelə onun ərlə arvadın ümumi əmlakındakı payına yönəldilə bilinər.
Misal üçün, ərin məhkəmə qərarı üzrə banka borcu olduqda və onun bu borcu ödəməyə vəsaiti yetmədikdə tələb onun birgə nikah dövrü ərzində əldə etdiyi əmlaka yönəldilir (həmin əmlak onun arvadının adına olsa belə)
Məhkəmələr nəzərə almalıdırlar ki, ər-arvadın əmlakının qeyri-bərabər bölünməsinə imkan verən uşaqların mənafeləri sırasına əsasən uşaqların sağlamlıq vəziyyətindən doğan, xüsusi qabiliyyətlərinin həyata keçirilməsinə təsir edən və ya qanunvericiliyə əsasən çoxuşaqlı ailələr üçün verilən sosial təminatlardan istifadə edən ailələrdə uşaqların həyat şəraitinin, məişət rejiminin, sosial-iqtisadi mühitin qorunub saxlanması zərurəti kimi müstəsna hallar aid edilir.
Bu baxımdan misal üçün, tərəflərin ümumi əmlakı iki mənzildən ibarətdirsə ümumi əmlakın bölünməsi zamanı məhkəmə valideynlərdən birinin əmlakdakı payını himayəsində saxlanılan uşaqların mənafeyini nəzərə alaraq, daha artıq müəyyən edə və həmin paya mütənasib olaraq sahəsi nisbətən daha geniş olan və ya otaqlarının sayı çox olan mənzili həmin tərəfə, sahəsi və ya otaqlarının sayı daha az olan mənzili qarşı tərəfə verə bilər. Yaxud ümumi əmlak iki avtomobildən ibarətdirsə, məhkəmə çoxuşaqlı ailədə ər-arvadın paylarını qeyri-bərabər bölə və həmin paya uyğun olaraq, daha çox oturacaq yeri olan avtomobili uşaqlar yanında saxlanılan tərəfə verə bilər.
Boşanma ərəfəsində birgə nikahda əldə edilən əmlak satıla bilərmi?
Reyestrdə qeydə alınmalı olub-olmamasından asılı olmayaraq, daşınar əşyalara sərəncam verilərkən əqdin tərəfi olmayan ərin (arvadın) razılığının alınmaması o halda əqdin etibarsızlığına səbəb olur ki, əldə edən üçüncü şəxs vicdanlı olmasın. Belə ki, ər-arvaddan biri digərinin razılığı olmadan onların ümumi əmlakı üzərində sərəncam əqdi bağlamışsa və əqdin iştirakçısı olan digər tərəf bu cür razılığın olmadığını bilirdisə və ya bilməli idisə, əqd bağlanmasına razılığı olmayan ər (arvad) tərəfindən mübahisələndirilə bilər (Ailə Məcəlləsinin 33.3-cü və Mülki Məcəllənin 222.3-cü maddələri).
Əldə edənin müvafiq razılığın alınmadığını bildiyi və ya bilməli olduğunu sübuta yetirmək vəzifəsi isə bunu iddia edən tərəfin üzərinə düşür.
Bu qayda daşınmazəmlakın dövlət reyestrində qeydə alınmış əşya hüquqları istisna olmaqla, ər-arvadın ümumi əmlakına daxil olan digər hüquqlara(yaşayış binasının tərkib hissəsi üzərində pay hüququ, icarə hüququ və s.) onlardan birinin razılığı olmadan sərəncam verilməsi ilə bağlı mübahisələrə eynilə tətbiq olunur.
Bəzən məhkəmə təcrübəsində ər-arvadın ümumi birgə mülkiyyətində olan daşınmaz əşyaya sərəncam verilməsi barədə onlardan biri tərəfindən bağlanmış əqdlərdə vicdanlılığı istisna edən qayda əldə edən tərəfindən sonrakı əvəzli özgəninkiləşdirmə əqdlərinə də tətbiq edilir və əşyaya dair bağlanmış sonrakı bütün əqdlər etibarsız hesab edilərək, əşya ər-arvadın birgə mülkiyyətinə qaytarılır. Halbuki Mülki Məcəllənin 225.6-cı maddəsi ər-arvaddan birinin razılığı olmadan sərəncam əqdi bağlandığı halda, əldə edənin vicdanlılığını istisna edir. Əgər bu əqd əsasında üçüncü şəxsin adına daşınmaz əmlakın dövlət reyestrində qeydiyyat aparılmışsa və sonradan onun tərəfindən əşyaya dair yeni sərəncam əqdi bağlanmışsa, sonuncu əqd üzrə əldə edənin vicdanlılığı qorunur. Çünki bu halda sərəncam əqdinin tərəfləri ər-arvaddan biri deyil, reyestrdəki mülkiyyətçi və qeydə etimad edən digər subyektlərdir.
Mübahisə predmetinin üçüncü şəxsin vicdanlı əldə edən olması səbəbindən geri qaytarılması və bölüşdürülməsi mümkün olmadıqda, məhkəmə həmin əşyanın özgəninkiləşdirildiyi halda, bazar dəyərindən iddiaçının payına uyğun olan hissəsinin eyni əsaslarla pul şəklində cavabdehdən tutulmasına iddiaçının razılığı ilə qərar verə bilər.
Məsələnin bu qaydada həll edilməsi iddia tələbindən kənara çıxma sayılmır. Çünki ər-arvadın əmlakının qanuni rejiminə söykənən iddianın obyektinin (avtomobil, pul) dəyişməsi, iddianın predmetinin (əmlak bölgüsünün) dəyişməsi hesab edilmir.
Bu zaman nəzərə alınmalıdır ki, iddiaçı ər (arvad), özünün razılığı olmadan üçüncü şəxslə bağlanmış müqaviləni sonradan bəyəndiyi üçün həmin müqavilə etibarlı hala gəlmişsə, predmetin bazar dəyərinin deyil, müqavilədəki dəyərinin payına uyğun hissəsini pul şəklində cavabdeh ərdən (arvaddan) tələb edə bilər. Belə mübahisələrə baxılarkən əqd əhəmiyyətsiz olduqda (müqavilənin mühüm şərtləri göstərilmədikdə, formaya riayət edilmədikdə və s.) isə belə müqavilə heç bir hüquqi nəticə yaratmadığı üçün əşyanın mülkiyyəti əldə edənə keçmiş sayılmır, yaxud sonuncunun adına aparılmış reyestr qeydiyyatı əsassız olur.
#mulki huquq # Ər-arvad # birgə mülkiyyət # boşanma # daşınar və daşınmaz əşyalar # nikah müqaviləsi # vekil nomreleri # vekil axtariram # vekil # hüquqşünas # vekil telefon nomreleri # vekillerin telefon nomreleri # huquqi yardim # huquq mesleheti # hüquqşünaslıq # vəkil
Şərhlər
Rafo Memmedov 2023-03-12 16:18:53
Salam.Birge nigah dovrunde alinib ve satilan avtomobiller nigah pozulanan sonra bolune bilermi?
Nuray 2023-03-14 19:02:03
Salam. Mən qeydiyyatda ərimin dostunun evindəyəm. Yaşadığın ev isə həyət evidi kupçasız, yalnız ərimin adımadı. Birgə nigahdan olarkən alınıb. Əmlak bölgüsü olanda arvada pay hansı evdən düşür.
Aytac 2023-05-22 22:01:40
Salam, boşanma zamanı cehiz və zinət əşyası bölgüsü necə aparılır?
Bextiyar 2023-06-13 12:03:23
Salam , nigah dovrunde alinan avtobil arvadin adina olan halda ere surmek ucun etibarname vermelidir yoxsa nece ?
Aytac 2023-07-08 03:38:59
Salam, biz bosanma erefesindeyik, cehiz esyalarimi qarsi teref qaytarmir, hemin evde yasadigim baresinde arayis lazim oldugu bildirilir hansiki orada qeydiyyatda deyilem ve elde ede bilmirem o arayisi. Mehkeme de arayissiz ancaq esyalarimi teleb ede bileremmi? Ve texmini bu proses ne qeder cekir?
Aytac 2023-08-02 11:53:03
salam. ananın qızına pay verdiyi evden (nigah dövründə) ,boşandıqdan sonra yoldaşa pay düşürmü? Yeni er ve arvadın birgə mülkiyyəti sayılırmı?
Cavidan 2023-08-14 15:09:30
Qulam muellim salam bir soz soruwum masin evli vaxtinda menim adima olub sadece evli vaxtinda qardawimin adina kecirmiwem .tutaqki sentyabr ayinda sonra noyabr ayinda bowanmaya vermiwem hemin vaxtdada syrme ucun dovernost almiwam. indi mawin mulkiyyetcisi qardawimdir ama pay bolgusu qoyublar bu duzgundur beyem? neyneye bilerem ? mawini qardawim mulkiyyetci ola ola elinden ala bilerler?
Səbuhi Əliyev 2023-09-12 00:32:50
Salam. Mənim anamın mülkiyyət sahibi olduğu evdə qeydiyyatdayam. Ev atamla nigah vaxtı alınıb ancaq sahəsi balaca olduğuna görə mən atamın çıxarışsız qeydiyyatda olduğu evdə yaşayıram. Anam məni qeydiyyatdan çıxartmaq istəyir. Yaşadığım yer isə çıxarışsız olduğu üçün ora qeydiyyata düşmək həm istəmirəm həmdə olmur. Məni mülkiyyət sahibi qeydiyyatdan çıxara bilər?
Rüstəm Məmmədov 2023-09-25 17:02:29
Salam zəhmət olmasa izah edərdiz bir məsələni. Mən bu yaxınlarda boşanıram. Yoldaşım uşaqları götürüb 1 ildən çoxdur ki evdən çıxıb gedib atasının evinə. Yaşadığım evin mülkiyyətçisi deyiləm, başqa evdə qeydiyyatdayam. Arvadım yaşadığım evin və ya qeydiyyatda olduğum evin bölünməsini tələb etsə nə dərəcədə qanunidir? Çox sağolun.
Gunay Hasanova 2023-10-26 05:26:14
Salam.men xarici vetendasla evliyem.xaricde evlenmisik amma nigahimiz Azerbaycanda tesdiq olunub.nigah dovrunde 3 illik kreditle ev almisiq.ev yoldasimin adinadir.evi aldiqdan sonra nigah müqaviləsini baglatdi mene ki bosansaq men ondan heç ne teleb etmeyecem.muqavileden sonra o oz olkesinde de ev alib.bilmek isteyirem Azerbaycanda kreditle alicante evdən mene pay dusur ya yox.xaricdeki nigah muqavilesinden sonra alinib yeqin ki ondan pay dusmur.Azerbaycandaki evdən pay dusur ya yox.tesekkur edirem
Aytac 2023-11-04 11:34:19
Salam. Boşanma ərəfəsindəyik. Yoldaşımın adında heç bir əmlak yoxdur hal-hazırda. Adında olanları da çıxarıblar. Əmlak bölgüsü necə aparıla bilər?
Mehdi 2023-11-11 12:40:19
2012-ci ildə ailə qurmuşuq, boşanma ərəfəsindəyik.çıxarışsız evim var və o evdə yaşamışıq.Ev atam tərəfindən 2008-ci ildə tikilib, amma qaz, su, işıq 2014-də sənədləşib.belə olduqda qarşı tərəf evin bölünməsi, satılması və ya başqa nəsə iddia qaldırıla bilərmi?
Turanə 2023-11-13 22:18:36
Salam, Anam atamdan boşanıb,3 ildən sonra atam əmlak iddiası qaldırıb,halbuki anam o evi hədiyyə alıb birgə nigah dövründə,1-ci məhkəmə xeyrimizə qərar verdi,lakin apelyasiyya qarşı tərəfin xeyrinə qərar verdi,güya atam evi əsaslı təmir edib (ortalığda heç bir sübüt olmaya olmaya)ali məhkəmə qətnamədə qondarma maddə əlavə edərək(güya 1-ci məhkəmədə şahid çıxışında atamın evdə əsaslı təmir etdiyini təsdiq edib)həqiqətdə elə şahid ümumiyyətlə olmayıb,ev anamın adın özəlləşdirilib,amma buna baxmayıblar,konstitusiya məhkəməsinə hansı dəlillərlə müraciət edim?
Aydin 2023-11-18 22:32:51
SALAM.Bosanma Erefesindeyik.Yoldasimla yola getmemezlikle evden cixib gedib Ve indi vekili iddia qaldirib Qizillar ve Evli oldugumuzda 2 masin Almisam.Masin birincisi oz adima etibarname ile olub.Avarya edib metal kimi Satmisam.İkinci Masin Aldigim adamnan Qardasimin adina etibarname verilib Ve sonra menim Adima Kecirilib.Ama Evden cixib gedenden 1 hefte sonra masini Satmisam.Bu Halda Yoldasima Masindan Pay dusurmu?Ve qizil zinet esyalarindan pay dusurmu?Zehmet olmasa Cavablandirardiniz.
Novruzova ILhame 2023-11-20 20:51:54
Menim 2 usagim var men bosanmisam evdən mənə pay dusurmu evi biz evli olan vaxtı tikmisik
Quiyeva aytən 2023-12-04 23:36:04
Salam mənim atamin evi anamla nikah müddətində alınlb anam vəfat etdikdən sonra atam basqa qadınla evləniv və o qadınla nikahi var ancaq evə qeydiyata salmayib indi atam da vəfat edib biz bir baci bir qardaşıq o qadının atamla anamdan qalan evdən nəsə haqql var ya ev bizə düşür?ya da nəsə məhkəməyə verib qadının hec bir haqq tələb etməməsi ücün nəsə etmək olar?
Akhmedova Saida 2023-12-15 01:46:05
1.Valideynin övladına hədiyyə etdiyi ev birgə nigahda olduqları vaxt satışa çıxarılanda həyat yoldaşının razılığı tələb edilir? 2.Nigahdan öncə alınmış əmlak birgə nigah dövründə satılırsa həyat yaldaşının razılığı tələb edilir? 3.övladln adında olan ev valideyn tərəfindən alqı satqı edilə bilərmi? qohumluq dərəcəsi var deyə qeyri-qanuni sayıla bilər? kupça yoxdur, həyət evidir, oğulun adındadır ev. atanın adına necə keçirmək olar?
Musayeva Mətanət 2024-01-20 13:16:35
Salam. Ər-arvad ortaq alınmış evdə tək qeydiyyatda ər varsa, ər yoldaşının icazəsi olmadan xarici ölkə vətəndaşını həmin evə qeydiyyata sala bilərmi? Həmin vətəndaşı qeydiyyatdan necə çıxarmaq olar? Xahiş edirəm məlumat verərdiniz. Arvad o evə necə qeydiyyata düşə bilər.
Tagirov 2024-01-20 16:23:00
Salam Aleykum.Bağışlayın narahat edirəm.Xaiş edirəm sualımı cavablandırasız.10 ildi evliyəm ,2 uşağım var boşanmışam.Birgə nikah dövründə 5 sot torpaq almışam . Həmin torpaqda ev tikmişəm, evin heç bir senedi yoxdur ,torpağın senedi var. Həmin torpaqdan 50 /50 bölünüb pay düşüb ona. Bu ev üçün iddia qaldırıb ona pay düşə bilərmi?
Qoshqar Nadirov 2024-01-22 14:57:34
salam hormetli Qulam bey. men 2013 de torpaq sahesi oz adima, 2018 dede menzili anamin adina almisam. onu deyimki xanim o evde prapiska deyil. 2020 de bosanmisiq. uzerinden 4 il kecib. xanim hansi emlaka qarwi bolgu isteye biler? yoxsa muddet kecdiyinden iddia ireli sure bilmez? cox xais ederim mumkunse cavablayin. evelceden tewekkurler ederim.
Quliyev Yusif 2024-02-08 20:38:49
Salam atam evin mulkiyetcisidir mende bu evde qeydiyatim var anam rehmete gedib men boyuk usaq oldugum ucun atamdan sonra ikinci mulkiyetci sayiliram,amma atam anamin rehete gedenden sora basqa arvadla nigaha dusub ama onu qeydiyata sala bilmir cunki men ona icaze erizesi vermirem,cunki analigimin meqsedi var ev ozellessin ona kecsin indi mehkemeye verib ki men o eve qeydiyata dusum o duse biler? men etirazmida bildirmisem mehkemeye idiea qarsi
Qocayev Qoca 2024-02-22 15:46:36
Salam.Mən evlənmədən əvvəl ev almışam Mtk sənədidir.Cıxarış bu yaxınlarda veriləcək.Cıxarış əgər evli olduğum vaxt verilsə birgə mülk sayılır ? Yoxsa satın alma zamanı önəmlidir ?
Tahir 2024-03-12 00:09:07
Salam ev atamın adınadır nigahdan əvvəl alınıb yoldaşım eve qeydiyata düşdükde ev daha sonra satilarsa mülkiyyətci hüquqi varmı?
Nurlana 2024-03-20 21:04:38
Salam. Birgə evlilik zamanı alınan mənzil bir tərəfin xəbəri olmadan başqa kiminsə adına keçirilə bilərmi?
Namiq balayev 2024-03-27 04:01:41
Salam Qulam bəy. Yoldaşımla birgə nigah dövründə sənədsiz ev almışam. Qeydiyyatda yoldaşım və uşaqlarımda var.hal hazırda boşanmışıq əmlakın satılmağını və ordan ona düşən pay tələb edir mən əmlakımı satmaq isdəmirəm nigah pozulduqdan sonra yaşayış üzrə qeydiyyatdan hansı halda çıxarda bilərəm? Zəhmət olmasa aydınlıq verərdiniz.
sevil 2024-04-21 11:41:44
salam menim 3 uşaqım var yoldaşım 1 ildi poşaya getmişdi gurcsdan vetendaşıdı inde xelbet gurcusdanan gelib usdume arvad alıb nomresin zadında deyişib deyir zakısdan cıxmışam o mensiz cıxa bilirmi zakızda gurcsdan zakısıdı uşaqlar az yaşdıdılar birde qundaqdı qucaqımda uşaqın ikisi ora vetendaşıdı uşaqları menen al bilermi mekemeye boşanmaqa vere bileremi uşaqıma sened alamıram vermiler nede xesdaxanalrda senetsizdiler baxmılar neneye bilerem nece boşanmadan metrka alım ya uşaqlar o olmadan oz adıma kecirde bilerem
Namiq Abdullayev 2024-05-12 05:54:51
Salam. Yaşadığımız mənzil bacımın adına alınıb. 3 il sonra bacım mənzili həyat yoldaşımın adına keçirdin. Hazırda boşanmaq ərəfəsindəyik. Bacım mənzili geri tələb edə bilərmi?
Rəfiqə 2024-05-20 17:40:02
Salam. Nikahdan sonra alınan mənzil, alan şəxs tərəfindən satılmaq istəsə, alan şəxsin ailə üzvlərinin xəbəri olmadan satma hüquqi varmı yoxsa ailə üzrvlərinində icazə və ya imzası mütləqdirmi? əgər varsa, ordan ailə üzvlərinə pay düşürmü?
Vəliyev ceyhun 2024-06-20 01:14:24
Salam.birgə nigah dövründə, doğma qardaşım mənə öz adına olan evi bəxşnamə yolu ilə asan xidmətdə mənim adıma keçirdib....indi bu evdən yoldaşıma pay düşür?bir oğlumuz da var 12 yaşında
Aytən 2024-06-29 13:14:08
Salam yoldasim 7 ildi evliyik 10 aydir ev almisik yoldasim evi bir basa qardasinin adina kecirdib sora senedler geldiksonra ise ozune hediyye eletdirib ki bosanar ken pay dusmesin nece 3tmek olar ki pay dussun
Zeyneb Kazimova 2024-07-11 15:55:19
Salam.Zəhmət olmasa cavablayardınız.Birgə nikah dövründə ər yeni tikili binadan öz adına ev alıb.Amma bina 2025 fevral ayında təhvil veriləcək.Bu müddət ərzində boşanma olsa qadına ordan pay düşər ? Və yaxudda 2025 ə qədər qadının xəbəri olmadan evi başqasının adına keçirdə bilər ?
İlqar Abdullayev 2024-07-23 11:45:38
Salam. Birgə nigah dövründə ev tikilib. Evin heç bir sənədi və tikilən evə qeydiyyatımız yoxdu. Boşandıqdan sonra qadının evə iddiası ola bilər? Əvvəlcədən təşəkkür edirəm
Gunay Nehmedli 2024-07-25 14:23:41
Salam. Biz evlilik muddetinde bakidan ev ,masin almisiq. Ama ikiside onun adinadi. Bosananda nece olacaq? Men bunlari satdirib haqqima duseni ala bilerem? Birde ki erimin zaten mene 10000 borcu var. Alib alladib qaytarmayib
Sənan Sənanov 2024-08-02 20:52:02
Salam. Atamın 91, anamın 67, mənim 27 yaşım var. Anam nigahdan əvvəl sovet dövründə işləyib dövlətdən ev alıb. Atamla nigaha girdikdən sonra o evi satıb, torpaq sahəsi alıb, ev tikib. Ev anamın adınadır. Atam və mən o evdə qeydiyyatda deyilik, adımıza mülk yoxdur. Atam boşanaraq evi satdırıb, pulu 2 yerə (anam və atam) böldürmək istəyir. Anam isə razılaşmır, evi öz pulu ilə aldığını deyir. Bu halda məhkəmə hansı qərarı verə bilər?
Aişə Səfərova 2024-08-12 08:56:34
Salam Qardaşım boşanır Ev rəhmətlik babamın adınadır Oda rəhmətə gedən 45 ildir Nə qardaşım nədə yoldaşı o evdə qeydiyyatda deyil O evdə boşandıqdan sonra gəlinə yaşamaq hüququ verilə bilərmi?
Ülviyyə Alış 2024-08-16 00:41:40
Salam. Yoldaşım nigahımızdan sonra ev alıb ama ev anasının adınadı. Anası həmin evdə bir gündə yaşamıyıb alınanan biz birgə yaşamışıq qaynanam dəyqədə hədəliyir sataram ataram sizi çölə. Yəni mənə pay düşür həmin evdən 1 uşaqım var yoldaşımda mənlədi yəni boşanmamışıq.
Aliyeva Lalə 2024-08-30 00:39:35
Salam.14 ildi yoldasim rəhmətə gedib yoldasim sag olanda ata anasiyla yasadigi evdə yasayirdiq ora gəlin getmisəm .yoldasim rəhmətə gedəndən sonra muvəqqəti yasamaq ucun oglumla anamin evində yasamaga basladim qaynanamla belə məsləhətləsdikki oglum boyuyub əsger gedənə qədər anamla yasayim oglum əsgərlikdən gələndən sonra qayidib gəlim sizin yaniniza indi oglumun 18 yasi var qaynanamla qaynatamda rəhmətə gedib baldizim o evi cixarib satisa mən ozum o evdə qeydiyyatdayam ancaq oglum cixarilib mənə və ogluma o evdən pay dusur .mən indi neynəməliyəm mənə məsləhət verərdiz xayiß edirəm.
Akif 2024-08-30 01:43:52
Salamaleykum Qulam Bəy.Hət vaxtınız xeyirli olsun.Mənim iki evim var biri kubçalı digəri isə alqı satqı MTK dan olan müqaviləsidir. 1.Boşanma halında mülk bölgüsü hər iki mənzilə də aiddirmi,yoxsa ancaq kubçalı mənzilə aiddir. 2.Mənzillərin hər ikisi evlilik dövründə alınıb.Ancaq yoldaşım heç bir yerdə işləməyib.Bütün qazanc mənim hesabıma olub.Məhkəmə qərar verəndə tərəflərin deklarasiya təqdim etməsini necə yanaşır.Məncə qazanc haqqında deklarasiya tələb etmək sui istifadə hallarının qarşısını alar.Məsələn mən işləyirəm və mən qazandığım pulun deklasiyasını təqdim edirəm ancaq qarşı tərəf heç bir yerdə işləmir və boşanmaq iddiası ilə nigaha xitam verilməsini istəyir.Bu halda ədalətsizliyin aradan qaldırılmasına köməklik edəcək tənzimlənmə varmı,varsa nədir?
Ceferov Kamal 2024-09-27 18:44:27
salam mən həyat yoldaşım başqa kişi ilə intim münasibətdə olduğu üçün boşanıram,arvadım mənzildə öz payını istəyir, mən onu vermək istəmirəm, çünki nikah mənim təqsirim olmadan pozulub. Mənzil nikah zamanı alınıb, amma atamın sexsi pulu ilə, atamın bütün lazımi sənədləri var ki, bağ evini sataraq bizə mənzil alib, kupca mənim adımdadır, amma evin texniki pasportu atamın adınadır, atam mənzillə bağlı hüquqlarını bəyan edə bilərmi və həyat yoldaşımı bu mənzilin payından məhrum etmək olarmı?
Ceferov Kamal 2024-10-03 13:10:37
Bəs təkcə xəyanət faktı həyat yoldaşımın mənzilin payından məhrum edə bilərmi?
Fəxrəddin Hüseynov 2024-10-07 09:54:47
Salam mənim oğlum 2 ildən çox evlidir və bu nigahdan 1 oğu var. Ev niğah dövrdən əvvəl alınıb və həyat yoldaşı bu mənzildə qeydiyyatda deyil.İndi Bunlar başanma ərəfəsindədirlər.Bu boşanmadan sonra gəlinə pay düşür yoxsa düşmür?
israfil quliyev 2024-10-08 08:25:21
Salam Qulam müəllim. Boşanmışamş Evli olarkan aylıq məvacibin bir hissəsini Həyat Yaşam Sığortasına verirəm. Hazərdada davam edir. Keçmiş həyat yoldaşım buna əmlak bölgüsü kimi iddia qaldırabilər. Əvbəlcədən təşəkkür edirəm.
Mustafayeva Xalide 2024-10-13 14:37:10
Salam.yoldasimdan pis vərdişlərinə görə boşanmaq istəyirəm.iki oğlum var.yasadigimiz ev qaynatamin adınadır.men boşansam bu evdən mənə ya uşaqlarıma pay düşür?
Səfərov Elçin 2024-10-28 03:50:58
Salam , Uşaq hansı halda atasının himayəsinə verilə bilər?
Azad 2024-11-05 18:30:18
Salam, Qulam müəllim, Mən birgə evlilik dövründə hipoteka ilə ev almışam.Hələdə müqavilədi və aylıq ödəyirəm.Kupcası yoxdu hələ.Kecmiş arvadım işlədiyi halda bir manat ödənişə yardım etməyib.uşaqların qayğısı məndədi,himayəsi onda və alimentdən imtina edib.Amma evdən pay isdəyir ona bu evdən pay düşə bilər. Aldığım qızıl və ziynət əşyalarının coxu da ondadır.
Aytən 2024-11-07 23:35:40
Salam, Atamla anam boşanıb ve ev bölünüb (2 çıxarış var hazırda) amma atam evi satmaqdan imtina edir. Bu halda anam mehkeme ile evi satdira ve ya evin yarısının qiymətini teleb ede bilərmi?
Ramil Məmmədov 2024-11-24 13:34:13
Salam ev yoldaşımın atasının adına idi indi hər iki valideynini vəfat edib evin kupçası yoxdur rəsmi vəsiyyətnamə də yoxdur mən həmin evə 30 min manata qədər xərc çəkmişəm boşanma zamanı mən o evdən pay tələb edə bilərəmmi?
Ceferof Kamal 2024-12-16 21:16:41
arvad evlilik dövründə aldığı mənzilə dair iddialarından imtina etmək istəyir, bunu harada etmək olar?
Şərh yaz